“Нээлттэй сургалтын тогтолцоо, нээлттэй их сургуулийг Монгол улсад хөгжүүлэх тухай” сэдэвт семинар 10 дугаар сарын 15-нд Континенталь зочид буудалд боллоо. Семинарыг БСШУЯ-ны газрын дарга Р.Бат-Эрдэнэ нээж хэлэхдээ орчин үед нээлттэй эх болон нээлттэй Их сургууль, үүний дотроос боловсролын нээлттэй эх ихэд дэлгэрч буйг тэмдэглээд Монгол орон ч мөн үүнийг нэвтрүүлэх шаардлагатай болж буйг онцлов.
ШУТИС-ийн КТМС-ийн др.профессор А.Эрдэнэбаатар “Боловсролын нээлттэй эх: мэдлэгжсэн нийгмийг байгуулах нь”, “Нээлттэй боловсрол” илтгэлүүд, др. дэд профессор Р.Төрбат “Нээлттэй боловсрол, нээлттэй их сургуулийн олон улсын чиг хандлага”, “Монгол улсын боловсролын системд мэдээллийн технологийг ашиглаж байгаа байдал, нээлттэй боловсролын тогтолцоог хөгжүүлэх хэрэгцээ, шаардлага” илтгэлүүдийг тус тус тавьж хэлэлцүүлэв. Дээрхи судлаачид нь Монголд нээлттэй эх болон нээлттэй Их сургуулийг хэрхэн ажиллуулах талаар судалсан ба 11 дүгээр сарын сүүлээр бодлого тодорхойлогчдод судалгааны үр дүн, саналаа танилцуулах ажээ.
Ирэх жилээс мэргэжлийн сургалт болон ерөнхий боловсролын чиглэлээр нээлттэй эхийн төсөл хэрэгжиж эхлэх юм байна. Мэдээлэл Шуудан Харилцаа холбоо Технологийн газар, БСШУЯ, Нийслэлийн Боловсролын газар болон зарим дүүргийн Боловсролын хэлтэс, хэд хэдэн сургууль, ТББ-ын төлөөлөгчид семинарт оролцов. Оролцогчид санал бодлоо солилцож байсны дотор багш нарын ур чадварын уралдаан, тэмцээн, нээлттэй хичээлийн видео бичлэгүүд, багш нарын бэлтгэсэн хичээлийн бичлэг зэргийг вэбэд тавихаас гадна нэгэнт төр мөнгөө төлөөд хийлгэсэн сурах бичгүүдийг ч мөн яам шийдвэр гаргаад нээлттэй болгон вэбүүдэд байршуулах нь зүйтэй гэсэн санал гаргаж байлаа.
4 years ago
No comments:
Post a Comment