“Хан-Уул хөгжил” сан оюуны хөрөнгө оруулалт хийв.

ХУД-ын 15 дугаар бүрэн дунд сургууль дүүргийнхээ анхны цахим сургууль боллоо. Мэдээлэл, технологийн хөгжил гэрлийн хурдаар хэмжигдэж буй шинэ зуунд дэлхийтэй хөл нийлүүлэн алхахын тулд боловсролын салбарт цахим ертөнцийн ололт, дэвшлийг нэвтрүүлэх нь чухал. Тиймээс ч боловсролын тогтолцоог өөрчлөн шинэчлэх “Цахим Монгол” хөтөлбөр хэрэгжиж буй. Хөтөлбөрийн хүрээнд өнгөрсөн жилүүдэд улсын хэмжээнд цөөн хэдэн сургууль цахим хэлбэрт шилжсэн. Харин нийслэлийн Хан-Уул дүүргийн 15 дугаар сургууль 2011-2012 оны хичээлийн жилд дүүргээсээ хамгийн анхны “Цахим сургууль” боллоо.

Сургуулийг цахим хэлбэрт шилжүүлж, мэдээлэл, технологийн ололтыг нэвтрүүлэх ажлыг “Хан-Уул хөгжил сан”-гийн тэргүүн, НИТХ-ын төлөөлөгч, АПУ-Трейдинг ХХК-ийн Ерөнхий захирал П. Батчимэг анх санаачлан ажил хэрэг болгохын зэрэгцээ санхүүгийн бодит дэмжлэг үзүүлж хөрөнгө оруулалт хийсэн байна. Цахим сургууль болох нь олон талын давуу талтай байдаг. Тухайлбал, багш, сурагч, эцэг эхийн хооронд онлайн холбоо бий болно. Ингэснээр эцэг эхчүүд хүүхдийнхээ сурлагын дүнд анхаарахад илүү хялбар болохоос гадна хичээлийн агуулга, хуваарь, гэрийн даалгавар, бусад мэдээллийг эцэг, эхчүүд нээлттэй үзэх боломжтой. Нэг үгээр, заавал сургууль дээр очно гэхгүй интернэтээс хүүхдийнхээ талаархи бүх мэдээллийг авч, багштай нь холбоо тогтоох юм. Үүний зэрэгцээ сурагчдын сурах идэвх, сонирхол ч нэмэгддэг давуу талтай. Багш нарын хувьд ангиасаа интернэтэд холбогдож, дэлхийн жишигт нийцсэн боловсролыг сурагчиддаа олгох нөхцөл бүрдэж буй.

Сургуулийн хичээлийн шинэ жилийн нээлтийн үеэр “Хан-Уул хөгжил сан”-гийн тэргүүн, НИТХ-ын төлөөлөгч П.Батчимэг “Энэ бол хүүхэд залуучуудын ирээдүйд оруулж буй оюуны хөрөнгө оруулалт” гэдгийг тодотгосон юм. “Хан-Уул хөгжил сан” дүүргийнхээ хүүхэд, залуусын хөгжилд хөрөнгө оруулах, дэмжлэг үзүүлэх, цаашид Хан-Уул дүүргийн ирээдүйн хөгжилд хувь нэмэрээ оруулах зорилгоор гурван жилийн өмнө байгуулагджээ. Энэ хугацаанд сангийн зүгээс хийж бүтээсэн ажил чамгүй олон бий. Хан-Уул дүүргийн 72 цэцэрлэгт зургаан компьютер хандивлан интернетэд холбож, хүүхдүүдэд тоглож наадах тоглоомыг гардуулжээ. Түүнчлэн дүүргийн Боловсролын хэлтсээс зохион байгуулдаг багш нарыг мэргэшүүлэх сургалтыг дэмжиж, хөрөнгө оруулсан байна.